30/12/2007

O pobo de moda



Diálogo entre estudantes en Santiago (1997):
- Ola guapísima, de onde ves sendo?
- De Vigo, e ti?
- De Ferrol...
- Bueno, de Vigo Vigo exactamente non, son de Arcade, coñeces?
- Mmmm, nin papa. Eu tampouco che son de Ferrol, son de Mugardos, xustiño do outro lado da ría, coñeces?
- Mmmm, nin papa...

Diálogo entre ex-estudantes en Santiago (2007):
- Ola guapísima, de onde ves sendo?
- De Arcade
- Coño, como a perruqueira do Interviú!
- Pois si, e ti?
- Eu de Mugardos
- Coño! Vaia unhas que montades por alí, eh!

Nota: Mugardos foi no 2007 un dos principais protagonistas da actualidade na web de novas galegas Chuza!. Estamos de moda.

22/12/2007

Solteiros 0-2 Casados



Ou ese foi o resultado que percibín. O balón aquel non entrara :)

Vale, vale, as fotos: aquí a de todiños, aquí a dos casados e aquí a dos solteiros.
E vai tamén un vídeo con polémica.

21/12/2007

Artritris en «A Nosa Terra»



«A Nosa Terra», o xornal no que colaboraron Castelao, Cabanillas ou Manuel Antonio celebra neste 2007 o seu centenario renovando a súa edición dixital. Hoxe, grazas á recomendación de Berto, teño a honra de aparecer nas súas páxinas de humor gráfico, con artigo e todo. Un luxazo. E se cadra non é a derradeira vez :)

20/12/2007

Mugardos, ano 22027



Descubro en Voz Natura os efectos do aumento do nivel do mar que se nos ven enriba. En canto teña con quen ter fillos —e os teña— avisareinos de que avisen aos seus respectivos fillos, e que aqueles perpetúen xeración tras xeración o aviso de que non merquen casa preto de onde hoxe temos a liña de costa.
Para que logo se queixen da prohibición de construír a 500 metros.

17/12/2007

O Ránking das Rondas



Mugardesas e mugardeses, sentide xa a proximidade das festas porque os locais todos, dende a Jarabeta ata o Millenium, dende o Malecón ao Trope, agardan xa ser invadidos por ordas de veciños de aquí e do exilio desexosos dos reencontros propios destas datas.

O Nadal 2007 chega este ano cunha novidade: o recoñecemento ás "Rondas" interxeracionais como feito cultural propio do mugardesismo. Fagámolo valer. Concedamos o galardón ao "Rei do Ránking das Rondas" do Nadal 2007. ¿Póñenvos pinchos? ¿É onde máis amizades atopades? ¿Teñen vetado o reaggeton? Vós mesmos decidides. ¿O premio? Ao local campión un xogo de camisolas personalizado co seu propio anagrama e o distintivo do "Rei do Ránking das Rondas". Alí mesmo, a noite de reis, o premio será para a parella de rondas gañadora do "Campionato Mugardés das Rondas": camisola de campións e algúns regaliños máis.

¿Xa tedes parella?

12/12/2007

Pido desculpas



A todo o que agardaba de min outra cousa. Todos temos un límite psicolóxico. Isto é un punto e aparte.

11/12/2007

María Alicia Martínez Leira



No seu día caeu nas miñas mans esta foto. Na familia non había constancia da súa existencia. A primeira pola dereita chamábase María Alicia Martínez Leira, "Maruja" na casa. Irmá de Francisco Martínez Leira "Pancho". Cos anos, tamén bisavoa miña. A foto sacáronlla a un grupo de mulleres da vila presas nos cárceres franquistas nos tempos en que pensar libremente privábache da liberdade. Préstame facerlle esta dedicatoria.

01/12/2007

Sempre en Mugardos



É reconfortante ver como en Mugardos aínda podemos gozar de campañas xurdidas da propia cidadanía, sen atopar por ningures o escudo do Concello.
Portomagno, a Asociación de Empresarios/as de Comercio e Hostalería de Mugardos comeza a dar agora os seus primeiros pasos, pero pode supoñer unha bocanada de aire fresco. Polo de pronto, os/as mugardeses/as xa temos un motivo para deixar os cartiños no pobo neste nadal sen necesidade de achegarnos a Ares, Fene, Narón ou Ferrol. Parafraseando aos feneses "Mugardés, merca en Mugardos". ¡E ademais agora podemos sacarlle moi bo proveito!

30/11/2007

A "coces" coa información (II)



Segunda entrega das "incorreccións" nas que cae "La Voz de Galicia" cando toca informar de Reganosa. Pensar que hai xente que cobra por escribir estas "reportaxes" e xente que paga por leelas..

28/11/2007

Emotipolbos



Recuperando o rego mugardoscéntrico, en canto dispoña do tempo que ultimamente non teño porei á vosa disposición a miña pequena contribución ao espallamento da cultura-polbeira-mugardesa cunha colección de emotipolbos para messenger e chateos varios. Prometo camisola tamén. ¿Gústavos?

25/11/2007

AEG



Manteño a vista atrás. Calquera tempo pasado parece mellor. Bótase de menos o idealismo que hoxe tentan derrubar individuos máis propios dun pesadelo de Kafka (autor ao que na puta vida lle leeron unha páxina) que da vida real.
En 1995, no daquela «Instituto de Bacharelato Mixto de Mugardos» (hoxe Instituto de Ensino Secundario) a «Equipa de Normalización Lingüística» tiraba a toalla laiándose de falta de apoio ao seu traballo. Non foi o xérmolo, pero si o catalizador do nacemento dunha alternativa xurdida no propio seo do estudantado: a «Asociación de Estudantes por Galiza». Alguén tiña que argallar o movimento cultural, e fixémolo nós mesmos. Durante case 3 anos a A.E.G. estivo detrás de proxeccións de cine galego, concertos e macroconcertos, edicións de revistas, organización do Día das Letras...
Na súa "época dourada" chegou a contar con máis de 30 alumnos activos e, polo que contan os que viñeron atrás, marcou unha época pequechiña na pequena historia dunha institución que se achegaba naqueles anos á súa primeira década de vida.

21/11/2007

Club Atlético Deportivo Leima



Non sabería dicir con cantos mugardeses das quintas do 1975 ao 1979 compartín as pistas polideportivas, campeiros e prazas de Mugardos enrolados nalgúns daqueles míticos "equipos de barrio" durante os anos 80. O Macabi, o Tropezón, A Pedreira, os da Cruz dos Caídos, a Calle María. Entre que eu era moi mediocre para iso do fútbol e que aínda era dos máis novos non tocaba moita bola no Macabi, así que marchamos un pequeno grupo de suplentes frustrados e decidimos que se non tiñamos sitio en ningún equipo habiamos de facer o noso propio. Xa daquela tiraba moito polo debuxo e soñaba escudos sobre as últimas follas das libretas de matemáticas. O noso equipo chamaríase "Leima" e o noso uniforme sería aquela camisola cun balón ben grande de baloncesto que viña coas bolsas (daquela eran bolsas) do leite Leyma. Todos tiñamos unha. E conta a lenda que co tempo aquel equipo fíxose grande, e chegou a ser nalgún momento o mellor de todo Mugardos. É certo, preguntade. Este de aquí era o noso escudo. Non precisei volver a velo para redebuxalo, repasei tantas veces os seus trazos que será das cousas que nunca esqueza. Que tempos...

18/10/2007

Gaseiros na néboa



Era por facer parodia da película de Michael Apted, que estamos perdendo o sentido do humor :)
Nota: A foto non está trucada, foi sacada ao LNG Cross River o 8/10/2007 ás 12:23. En alta resolución aquí.

16/10/2007

Grandes inventos do século XXI



Hoxe entrou por méritos propios no Museo dos Grandes Inventos da Humanidade o GPS co que Reganosa agasallou á Autoridade Portuaria, valorado en 30.000 euros e que, segundo palabras dos propios técnicos, coa tecnoloxía da que xa dispoñen "poderíase facer igual máis barato". Disque a néboa xa non ía ser obstáculo para a entrada de gaseiros. Disque...

04/10/2007

Cartografía dos apelidos de Galicia



Un dos tesouros que agocha a rede no noso país é esta Cartografía dos apelidos de Galicia que descubrín hai tempo grazas ao amigo Calidonia. Achegueime así ás orixes dos meus antergos, ao tempo que comprobei que, tal e como me dixera un mestre alá por 6º da EXB, teño uns apelidos moi galegos (no mapa, que amosa a superposición dos dous, a cousa semella clara).

26/09/2007

24/09/2007

The silence of the lambs



Xa tivo a ben entrevistarse cos veciños de Meá o Director General de Política Energética e Minas. Do Presidente da Xunta e o Ministro de Industria non se sabe ren. Tan altos cargos é lóxico que só baixen xunto da plebe cando toca pedir votos.

19/09/2007

Manifesto de solidariedade coa Plataforma de Veciños O Cruceiro de Meá



Quen asinamos máis abaixo solidarizámonos coa Plataforma de Veciños do Cruceiro de Meá (Mugardos), pechados na Casa do Concello de Mugardos desde o mes de xullo, porque cremos que calquera veciño, calquera cidadán ou habitante, deste país ou de calquera outro, ten o dereito a que non lle estraguen a súa paisaxe e seu o contorno, e a non vivir a súa vida baixo a ameaza silenciosa dun perigo terríbel.

Quen asinamos este manifesto acreditamos que a xustiza e as leis que nos damos teñen que servir para defender os principios de igualdade e de liberdade, e non para protexer os intereses dos máis poderosos e xustificar as decisións que estes toman á marxe de toda legalidade e amparándose nos recantos máis escuros da sociedade e da humanidade.

Quen asinamos estas liñas acreditamos nun modelo de desenvolvemento sustentábel e autocentrado, que non repita os erros que se cometeron no pasado ao localizar empresas en sitios inaxeitados, e ao promover industrias de enclave que dun ou doutro xeito acaban por explotar e esgotar os recursos naturais que tamén son patrimonio de alguén, nosos ou doutros pobos.

Quen asinamos aquí sabemos que a existencia de REGANOSA en Punta Promontoiro trouxo tamén consigo a miseria e a baixeza morais de quen quixo ou precisou poñerse do lado dos poderosos, así como a tristura de ver enfrontados a veciños con veciños e a familias con familias, e que non hai forma máis implacábel de acabar cunha comunidade que destrozala dividíndoa desta maneira.

Quen asinamos temos a esperanza de que se traslade esta instalación fóra da Ría de Ferrol, na súa localización primixénea e ideal do Porto Exterior, e estamos convencidos de que aconteza o que aconteza coa nosa causa, moitas outras persoas están atendendo e entendendo, compartindo, ensinando e aprendendo desta loita que ante todo é xusta e fraternal.

Asina este manifesto aquí.

13/09/2007

Curiosirregularidades no Catastro


¿Que explicación pode ter que unha leira e vivenda de irreductibles mugardeses desapareza misteriosamente das referencias do Catastro (sen os propietarios saber ren) para (oh, sorpresa!) formar parte dun pupular polígono industrial?

Desturpando a toponimia (II)



¿Punta Promontoiro ou Punta Promontorio?

11/09/2007

Transparencia



Xa postos sobre o asunto dos 20.000 euros ao que a infame La Voz de Galicia (sempre disposta á información monolateral darredor de Reganosa) concedeu rango de verdade absoluta (non acompaña ao titular dun "según palabras de fulanito" como sería habitual nestes casos), e aproveitando que a chegada do bipartito puxo sobre a mesa prácticas tan loables como as reflectidas na Lei de Transparencia, gustaríame como veciño da vila coñecer euro a euro a orixe dese suposto gasto de 20.000 euros fora de orzamento ao que se refire o Alcalde en concepto de luz e horas extras da Policía Local. As contas, así de primeiras, semellan difíciles de cadrar (estariamos falando de preto dos 4.000 € extras por axente en só mes e medio), inda que sempre podería tratarse de a) unha pequena inflacción á hora de pedir axudas á Xunta ou b) un pouco cabaleiroso intento de lixar a imaxe da veciñanza pechada no Concello.

27/08/2007

Linguas cruzadas



Hoxe fago viaxe máis aló das fronteiras pulpeiras para rescatar do Google Video esta reportaxe e ofrecerlla a canta xente nova da vila teña a ben dedicarlle uns minutiños. Identifiqueime moito coa rapariga de Marín que recoñecía ser a única galegofalante do seu instituto, inda que nos meus tempos chegouse a extender un chisquiño a "epidemia" ;)

23/08/2007

A miseria sen límite



Asumín no seu día que manter as miñas ideas por enriba de dictames gregarios podería ter un prezo político. O que non imaxinei é que a miseria humana alcanzase cotas tan altas como para dar o salto ao terreo persoal. Dende onte un anónimo molesto coas miñas opinións sobre a planta de gas dedícase a usar este mesmo blog no que eu me identifico publicamente para atacar á miña familia, a persoas que nunca escolleron entrar neste circo de Internet. Onte borrei todo canto escribiu, hoxe deixarei que vexades ata onde é capaz de chegar esta xente e imaxinedes de onde veñen os tiros (que é o que máis doe).

17/08/2007

Entrou





Á segunda, pero entrou. E como mañá non estou, velaí a razón:

Lugares de Interese Comunitario na Ría de Ferrol



Aquí tendes o mapa dos Lugares de Interese Comunitario para a Ría de Ferrol. Podedes comprobar como a entrada ao interior está encadrada neles, como xa advertiu o CCE. Pois esa entrada da ría, protexida ambientalmente, queren dragala para que os gaseiros pasen tódalas semanas sen ter que depender da marea alta. Claro que conseguir dragar un espazo LIC non vai ser cousa de tres días. Eis unha mostra máis da descomunal cafrada que temos diante.

16/08/2007

Os veciños de Meá (día 24)



A visita de Xosé Manuel Beiras aos veciños de Meá axudou a demostrar que o problema da planta de Reganosa no interior da ría transcende dos posicionamentos públicos dos partidos políticos e afecta transversalmente a todos eles provocando (nalgúns máis dramaticamente que noutros) fendas nos seus propios seos. Non é, malia o que moitos pretendan transmitir para propio consolo, a loita de IU contra o resto. Dou fe.

13/08/2007

Máis adhesións



As festas de Ferrol están convertíndose nunha fonte inesgotable de adhesión ao movimento pro-sentido-común abandeirado nestas datas polos veciños de Meá. O venres eran os Mystic Feah Rockers, teloneiros no concerto de Muchachito Bombo Infierno no Raíña Sofía, os que nos agasallaron cun temazo en clave ska co que cantamos "A ría é nosa e non de Reganosa" ata fartar. O sábado era Banda Bassotti quen erguía a bandeira do sentido común nun recinto ateigado de xente (¿efecto anti-reaccionarios?). ¡A seguir así!

Foto extraída de www.primeiralinha.org

09/08/2007

Os veciños de Meá (día 17)



Onte foi o polifacético Xurxo Souto quen quixo achegarse por Mugardos para dar folgos aos veciños de Meá pechados na Casa Consistorial. Conseguiu crear un clima distendido e de ilusión por conquerir os obxectivos. Non foi o primeiro persoeiro en achegarse ata o Concello. Os cantautores João Afonso, Luis Pastor e Pepe Constenla, a actriz Mabel Rivera e o director Enrique Banet quixeron tamén amosar o seu apoio á causa. Non serán os últimos.

07/08/2007

Mugardesas ilustres: Mercedes Roldós



Hoxe vai de ilustres, porque onte déronme conta dunha mugardesa que é Consejera de Sanidad do goberno canario e antes Diputada no Congreso polo Grupo Popular. Non é exactamente da miña corda, pero iso non lle resta mérito :)

03/08/2007

Accidente en planta de GNL en Australia, ou como a Lei de Morgan castiga as cafradas



Si, vale, «Noche de impacto» peca de sensacionalismo. A min tanto me ten o dramatismo da voz en off, e tampouco se trata de crear alarmismo, pero cando as leis indican os radios de achegamento destas plantas de GNL aos núcleos de poboación será en previsión de accidentes deste tipo.

A estúpida teoría de "non vai pasar nada" estame facedo plantexar montar almacén pirotécnico no Cano da Rúa. Primeiro vou pedir permiso para facer un alpendre de 50 m², en realidade construireino de 150 m² e logo alegarei que teño espazo suficiente para ser almacén pirotécnico. Logo farei socio da miña empresa á Administración que máis me conveña para que lle dea aceite ao meu plan. Poñerei anuncios (tradúzase a €uros) tódalas semanas na Voz, á que lle pasarei notas de prensa prometendo ducias de postos de emprego para asegurarme de que os sindicatos non dan chío. Ao final, terei montado o meu almacén pirotécnico con toneladas de pólvora no Cano da Rúa e pedirei licencia de actividade. Por último, redactarei un Plan de Emerxencia xeitosiño, feito adrede para a miña pirotécnica-no-medio-do-pobo, e un a un irei chimpando a canto veciño non escapase aínda do meu alento... Ríete ti das estratexias de Tojeiro!

01/08/2007

Eles tamén son mugardeses



Como estamos en días de calor e festa, aí vo-lo deixo:

Ay...
Me sube la bilirrubina
¡ay! me sube la bilirrubina
cuando te miro y no me miras
¡ay! cuando te miro y no me miras
y no lo quita la aspirina
¡no! ni un suero con penicilina
es un amor que contamina
¡ay! me sube la bilirrubina

31/07/2007

Plan de Emerxencia Exterior de Reganosa



Xa podedes descargar aquí o Plan de Emerxencia Exterior de Reganosa. Resulta curioso como novamente amputan os mapas por onde máis lles convén: antes borrábanlle a entrada á ría, agora borran parte do Penedo. Tamén é de coña que os "elementos de valor histórico, cultural ou natural" sexan o Castelo da Palma ou a igrexa de Franza, sen mencionar o importante xacemento de Caldoval que xa destruíron, o de Santa Lucía, que podería verse afectado na pretendida ampliación a catro tanques, ou o de Noville, que o teñen na outra beira da enseada da Barca.

26/07/2007

Os veciños de Meá (día 4)



Mañá venres ás 12:00 os veciños de Meá terán unha entrevista con Francisco Barroso Palomino, Director da Área De Industria e Enerxía da Coruña, organismo provincial dependente do Ministerio de Industria que ten a competencia para aprobar ou non a autorización definitiva de funcionamento que Reganosa ten que solicitar. Ás 18:00 convocan a todos aqueles que queiran achegarse ata o Concello a unha rolda de prensa para informar dos avances conseguidos. Ficades convidados.

10/07/2007

Colleita do 77



Esta é unha convocatoria a tódolos que, nacidos no 1977, pasamos a nosa infancia no patio de recreo do «Unión Mugardesa». Nós, a Colleita do 77, chamamos a filas a toda a quinta nun brinde dos que a meirande parte son sabedores da súa xestación. Hoxe si, hoxe o brinde ten día, hora e lugar. Se ti que les isto non és da miña quinta, pero coñeces a alguén dela, por favor, faillo saber. Non pode faltar ninguén!

03/07/2007

400 metros



Recibo o mércores 27 de xuño, na sobremesa, unha chamada ao teléfono da casa. Do outro lado unha voz de muller pídeme 5 minutos para respostar a unhas preguntas. Na primeira delas quere coñecer o que para min son os tres principais problemas de Mugardos: "o primeiro a planta de gas". Tivo a súa graza, porque a partir de entón o resto das preguntas estaban claramente direccionadas para obter as respostas desexadas, sen moita marxe para as posturas críticas: que se coñezo o plan de emerxencia de Reganosa, que se a planta de gas creará postos de emprego, que se creo que Galicia precisa dunha industria deste tipo... Pregúntolle para quen é a enquisa e contéstame que ela non o sabe. De risa. Imaxínoo, inda que tanto me ten, había de contestar o mesmo. Pregúntolle entón se se vai interesar sobre o que opino da entrada e saída de buques cargados de GNL na ría, ou sobre o sistema de regasificación con 300.000 m³ diarios de auga do mar. Non, claro. Con todo, a conversa con ela é cordial. É unha curranta, así que facilítolle o traballo e procuro perder o menor tempo posible, que eu tamén teño presa. Ao final unhas pequenas confidencias en off e un "moitas grazas". Falaba galego.
Hoxe aparece na prensa que a Consellería de Presidencia vai aprobar en breve o plan de emerxencia exterior de Reganosa. Entón xorde a dúbida ¿Como carallo me preguntan se coñezo un plan que aínda non existe? E non será por non terllo pedido por escrito ao Alcalde.
Estase a comentar polo pobo que a enquisa fixéronlla aos veciños que vivimos nas proximidades da planta de gas e que incluso nalgúns fogares quixeron sondar a opinión de varios membros. Todo moi natural...
P.D.: Abstéñanse de enviarme correos coaccionantes. Dame a risa con eles.
P.D. 2: O que vedes representado na imaxe de satélite é o límite que marcan os 400 metros "de seguridade" respecto do perímetro de Punta Promontorio. Non son "unha ou dúas casas" precisamente...

16/06/2007

Concelleiras



E velaquí está a que dende hoxe xa é a representación máis numerosa de mulleres na Historia do Concello de Mugardos: Anxos Díaz Prados (BNG), Begoña Gómez Díaz (PP), África Pérez Filgueiras (PSdeG-PSOE), Pilar Díaz Otero (EU-IU) e Carolina Cruz Fernández (BNG). Parabéns e moita sorte a todas.

13/06/2007

Segue sendo mugardés :)



Non sei por donde se colou, pero colouse, e xa sabedes como son os paxaros nestes casos: tolean e turran contra as fiestras. Este non foi menos e levou un hostiazo que non o quería para min. Pensei que me morría porque era peso morto e abría o pico como se lle faltase a vida, pero os da vila sómosche duros de carallo e 5 minutos de mimos máis tarde xa o tiñades en rampa de lanzamento. Quedamos de vernos para a Festa do Polbo e botarlle unhas :)